Alle Jahre wieder… Mir hend au s’Jahr 2024 für oisi Jugend am 17. Januar mit em Qualiwettkampf für de Hallewinterwettkampf gstartet. Wie immer het de amne Mittwuch-Abig anstell vom normale Training im Chalchi stattgfunde. Dur das hets au dasmal wieder e reegi Beteiligung geh und us dem interne Chräftemesse hend sich schlussendlich oisi 28 tapferste Chrieger und Chriegerinne fürs Finale am 23. März in Bülach chöne qualifiziere. Sie hend kämpft, gfightet, hend ihres Herz und ihri Seel a dem regnerische Samstig für oise Verein ide Sporthalle Hirslen glah. Am Endi het ein Podestplatz vom Nico Schmid useglueged und ich bin froh gsi dass mer oisi Fahne doch no hend chöne präsentiere. E wiiteri Erfolgsmeldig hets denn no usem Leiterwettkampf geh. D’Fiona isch det nämlich sensationell uf de ersti Platz gsprintet und het somit oises Teamergebnis chli chöne ufbessere. Mit de Lara hemmer sogar no e wiiteri Medaillehoffnig im Renne gha wo zwar leider knapp ned het chöne reüssiere aber ich bin mer sicher, dass sie das ned so eifach wird uf sich sitze lah und mir ois das Jahr wieder uf es packends Duell zwüsched dene beidne chönd gfasst mache.

Nach knappe zwei Mönet Wettkampfpause, i dene selbstverständlich jedi Wuche wie verruckt trainiert worde isch, simmer am 12. Mai, amne heilige Sunntig aber natürlich einisch meh zunere absolut unchristlich früehne Stund, miteme 23-chöpfige Kader uf Wil an Jugendsporttag greist. Leider het bide Einzelwettkämpf am Morge wie scho im Vorjahr kein Podestplatz usegluegt. Nichts desto trotz söll erwähnt sii, dass sich doch 9 vo oisne Kids uf en Platz mit Uszeichnig grennt, gworfe, gumped und turnt hend. Da devo sind e Maisha und e Joelle bsunders hervorzhebe, wo es Podest nur um knappi 0.15, resp. 0.25 Pünkt verpasst hend. Am Namittag bide Spieli hets denn doch no en Vollerfolg geh für Schliere. Im Linieball het mer alli gegnerische Teams vo vore bis hine dominiert, het die andere Spilerinne usdribbled als wäreds Slalomstange und het so am Endi vom Tag de Gruppesieg chöne erringe. Bide abschlüssende Staffette het denn nüt zählbars meh usegluegt, aber ich denke mir alli chönd nahvollzieh, dass nach somene Grosserfolg im Linieball denn halt au de Pfuus chli dusse isch.

Glücklicherwiis chunt nachem JUSPO und dene grosse Strapaze für d’Jugend traditionell e ziit vode Erholig. D’Summermönet stönd ganz im Zeiche vode Entspannig und Regeneration, mer pflegt Fründschafte, gnüsst s’zeme-sii, s’zeme-trainiere, s’zeme-luschtig-ha und s’zeme-esse-und-trinke wie bispiilswiis am alljährliche Summer-Grilliere ide letschte Wuche vor de Summerferie.

Nach de Summerferie isch denn am 28. September bereits de letschti Jugendwettkampf, nämlich de ReJuWe in Winige, agstande. Schliere isch mit 7 Teams vertrete gsi. D’Usbüüti vom Tag isch hervorragend 1 erste Platz ide Kategorie A/Buebe, wie au 2 zweiti Plätz ide Kategorie D/Buebe und C/Meitli gsi. (Dass ide Kategorie A/Buebe ussert Schliere kei anderi Teams vertrete gsi sind, schmöleret de Erfolg natürlich ned im Gringste.) Als wär das ellei ned scho grossartig, hets obedruff auno jewils en zweite Platz ide Riigestafette sowohl bide Buebe wie au bide Meitli geh. Aso ich weiss ned wie ihr das gsehnd aber für mich isch das ufere Skala vo 1-10 obenuse.

Und so het au s’Wettkampfjahr 2024 zum wiederholte Mal mitere Medaillefluet es grandioses Endi gfunde und ich freue mich uf villi wiiteri so tolli Jahr mit eu, mit allne Leiterinne und Leiter und mit allne Helferinne und Helfer, wo das alles immer wieder überhaupt ersch möglich mached.